08. febrúar 2022

Er komið að skimun hjá þér?

Nú er í gangi ljósmyndasýsning í Kringlunni með yfirskriftinni Er komið að skimun hjá þér? Sýningin er hluti af hvatningarátaki Samhæfingarstöðvar krabbameinsskimana og Heilsugæslu höfuðborgarsvæðisins um mikilvægi skimana fyrir leghálskrabbameinni. Tólf konur úr íslensku samfélagi leggja átakinu lið og deila persónulegum sögum af leghálsskimun.
 
Þátttaka kvenna í skimun fyrir leghálskrabbameini hefur farið minnkandi síðustu ár. Eftir flutning skimana fyrir leghálskrabbameini til heilsugæslunnar í upphafi síðasta árs komu upp vandkvæði sem nú hafa verið leyst. Þau sneru helst að löngum biðtíma eftir niðurstöðu leghálssýna sem send voru til Danmerkur. Landspítali hefur nú tekið við rannsókn sýnanna og verður flutningurinn framkvæmdur í þrepum út þetta ár. Í dag er biðtími eftir niðurstöðu rannsóknanna allt að 40 dagar, en í mörgum tilfellum líða þó aðeins 1-2 vikur. Þetta er sami biðtími og konur gátu reiknað með hjá Krabbameinsfélaginu.
 
„Við erum komin á allt annan og betri stað í dag en fyrir ári síðan, enda höfum við lagt mikla vinnu í að koma þessari mikilvægu þjónustu í það horf sem hún á að vera í. Við munum að sjálfsögðu halda ótrauð áfram að bæta þjónustuna, bæði hvað varðar upplýsingar um skimunina og þá þjónustu sem veitt er. Nú er stóra verkefnið hins vegar að fá konur til að mæta í skimun og þess vegna blásum við til sóknar í þeim efnum,“ segir Ágúst Ingi Ágústsson, yfirlæknir Samhæfingarstöðvar krabbameinsskimana.
 
Þegar heilsugæslan tók við leghálsskimunum í ársbyrjun 2021 var HPV frumskimun innleidd eins og tíðkast í nágrannalöndum okkar. Talið er að um 80% kvenna smitist af HPV veirunni einhvern tímann á ævinni. Fylgst er sérstaklega með konum sem smitast af HPV. Sé sýkingin viðvarandi aukast líkur á forstigsbreytingum og síðar krabbameini sé ekkert að gert. Veiran smitast helst við samfarir en ónæmiskerfi líkamans getur losað sig við hana án nokkurra afleiðinga á nokkrum mánuðum.
 

HSA býður er upp á mánaðarlega leghálsskimun á heilsugæslunum Neskaupstað, Egilsstöðum, Vopnafirði og Djúpavogi, tímapantanir í síma 470-1400.
Bjóðum sérstaklega allar konur velkomnar sem fengið hafa boðsbréf en vakin er athygli á þvi að konur sem hafa áhyggjur af einkennum frá leghálsi ættu að leita til læknis óháð því hvort komið sé að reglubundinni skimun.

Sy ning allar mmerki